Во основа црквата е трокорабна со галериски простор и покриен надворешен трем пред влезот на црквата. Корабите се издвоени со дрвени балвани обложени со варов малтер. Над самите галерии над парапетот изведени се мушарабии. Дрвото и бондручната традиционална конструкција се јавуваат како доминантен израз во тоталната композиција на манастирот. Фасадата е изведена од грубо обработен камен поставен помеѓу кушаци. Кровот е на четири види и е покриен со ќерамиди.

На иконостасот што го дели олтарот од средниот дел се вградени 10 таканаречени царски икони со врвен уметнички дострел. Од првобитниот иконостас сочувана е само една икона со претставата на Светиот пророк Ное, дело на иконописецот Георги Велјанов од Струмица, изработена во 1818 година. Од 1899 до 1920 година во манастирот работел и зографот Гаврил Атанасов-Беровец.

Од јужната, западната и северната страна на црквата се сместени конаците во кои живеат монахињите.Тие се изградени во чиста малешевска стара архитектура на приземје, со вкупно 16 соби и површина од 560 м2. Во својот најголем подем манастирот броел до шеесет монахињи (калуѓерки) со развиена богата економија, богословско училиште, ткајачница.

Св. Архангел Михаил

Општина Берово

Црквата Св. Архангел Михаил е изграден во периодот од 1815 до 1818 година, а осветена е во 1818 година. Првите монашки келии биле изградени во 1840 година.

Според легендата Парохискиот свештеник, поп Пецо, бил задолжен да обезбеди дозвола за градба од Уќуматот што се наоѓал во Радовиш. Валијата дал дозвола за градба, но под многу тешки, речиси неостварливи услови. Имено, црквата да биде изградена ниско под нивото на патот и да не се гледа, градењето да заврши за четириесет дена, а поп Пецо, најмалата своја ќерка, Султана, да ја даде во харемот. Условите не ги обесхрабриле беровчани во нивната намера. Со голем труд и пожртвуваност на верниците црквата била изѕидана и покриена со камени плочи за четириесет дена. За да не биде забележлива, надворешниот ѕид бил премачкан со саѓи и со вар. Кога видел валијата дека црквата е изградена над земјата по истекувањето на рокот, многу се налутил, и наредил тројцата црковни настојници веднаш да бидат убиени пред црквата, а бидејќи Султана избегала во Ќустендил, поп Пецо бил затворен. Тој бил пуштен од затвор по три години, а неговата ќерка се вратила во Берово кога разбрала дека комитите го убиле валијата.

Со активностите на манастирот тесно се поврзани Разловечкото (1876) и Кресненското востание ( 1878) година.

Св. Архангел Михаил

Општина Берово

Со активностите на манастирот тесно се поврзани Разловечкото (1876) и Кресненското востание ( 1878) година.